Баабар
Манай үндэстний түүх бичлэгт эргэлт хийсэн Баабарын Монголчууд: Нүүдэл суудал бүтээл анх 1996 онд олны хүртээл болсон. 1999 онд Кэмбрижийн Их сургуулийн хэвлэлийн газраас эрхлэн англи хэлнээ, 2010 онд орос хэлнээ тус тус хөрвүүлэн хэвлэснээр, дэлхий нийтийн хүртээл болсон. Одоо энэ бүтээлийг франц, испани, солонгос хэлээр орчуулан хэвлэх санал ирснийг бодолцоод зохиогч номоо бараг цоо шинээр бичихээр шийдэн дөрөв дэх хэвлэлийг уншигчиддаа хүргэсэн нь агуулга багтаамжийн хувьд 1996 оны анхны хэвлэлээс дөрөв дахин олон буюу 1 700 орчим эшлэлтэй болсон бөгөөд 1 500 гаруй зургаар нэмж баяжуулжээ. Өдгөө дэлхийн өнцөг булан бүрт их, дээд сургуулиудад Монголын түүхийн судалгааны гол сурвалж болж байгаа эл бүтээл бүхэлдээ Монголын ХХ зууны түүхийг өгүүлдэг. Номын нэгдүгээр бүлэгт нэн эртнээс ХХ зуун хүртэлх Монголын түүхийг тоймчлон харуулжээ. Энэ хэсэгт сайн судлагдсан учир Өрнөдийн болон Хятад, Оросын эрдэмтэн, түүхчдийн судалгаанд тулгуурласан байна. Хоёрдугаар бүлэг нь 1911 онд Монгол тусгаар тогтнолоо сэргээснээс эхлээд 1924 онд Бүгд найрамдах улс болсон үеийг, гуравдугаар бүлэг Монгол улс “дэ юри” тусгаар тогтнолоо зөвшөөрүүлсэн 1946 оныг хамрах бөгөөд дөрөвдүгээр бүлэгт нүүдэлчид хэрхэн иргэншсэн, хотожсон, коммунжсан, ардчилсан тухай, мөн 1992 онд шинэ Үндсэн хуулиа баталсан тавь шахам жилийн намтрыг тус тус өгүүлжээ.