Женерал Электрик компанид энгийн ажилтнаас гүйцэтгэх захирал болтлоо тушаал дэвшиж, компаниа дэлхийн тэргүүлэгч компаниудын тэргүүн эгнээнд жагсааж чадсан төдийгүй өөрөө олон улсад CEO-ийн CEO хэмээн хүлээн зөвшөөрөгдсөн хүн бол Жэк мөнөөс мөн.

Хүн төрөлхтний үндсэн ялгарал нь оюун ухаан гэхэд хэн ч маргахгүй биз ээ. Оюун ухаант хүний амьдрал нь алхам тутамдаа магадгүй хоног, өдөр, цаг, минут, секундээр хэмжигдэх шийдвэр гаргалтуудад тулгуурладаг. Шийдвэр гаргалт нь өөрөө хувь хүний менежментийн хэмжүүр бөгөөд оновчтой менежмент амжилтын гол үндэс болдог гэхэд дэгсдэхгүй. Таны хувьд хамгийн манлайлагч хүн хэн бэ? гэж асуувал салбар бүрийн олон төлөөллийг нэрлэж чадах байх. Намайг нэрлэ гэвэл энэхүү номын зохиогч Жэк Вэлчийг итгэлтэйгээр хэлнэ. Яагаад гэвэл тэрээр бизнес эрхлэгч, тэр дундаа байгууллага, хувь хүний менежментийн талаар арвин туршлага мэдлэгтэй олон улсад хүлээн зөвшөөрөгдсөн нэгэн юм.
Би 2017 онд Хонконгийн нисэх онгоцны буудалд түр саатах зуураа энэ номыг худалдан авч, уншсан цагаас зөвхөн номыг уншиж ойлгохоос гадна энэ хүний талаар таньж мэдэж, суралцах зайлшгүй шаардлага тулгарсан. Номын зохиогчийг мэдэх болсон шалтгаан нь энэ. Финас таймс сэтгүүлийн оны онцлох  хүн, Форчун сэтгүүлийн XX зууны шилдэг менежер гээд түүний олон гайхалтай амжилтууд нь дэлхийн алдартай бизнесийн удирдагчдын нэг гэдгийг батална. Бизнес, менежментийн бэлгэ тэмдэг болсон энэ эрхмийн амжилтын нууц нь өөрийн туулж өнгөрүүлсэн ажлын карьер, туршлага нь байсан гэдгийг энэ номоос мэдэж болно. Та бидний сайн мэдэх Женерал Электрик компанид энгийн ажилтнаас гүйцэтгэх захирал болтлоо тушаал дэвшиж, компаниа дэлхийн тэргүүлэгч компаниудын тэргүүн эгнээнд жагсааж чадсан төдийгүй өөрөө олон улсад CEO-ийн CEO хэмээн хүлээн зөвшөөрөгдсөн хүн бол Жэк мөнөөс мөн.
New York Times, The Wall Street Journal-ын шилдэг борлуулалттай энэхүү бүтээл нь сүүлийн зургаан жил миний ширээний ном төдийгүй үнэнч зөвлөгчдийн нэг болсон. Түүний бизнесийн стратеги, арга барилаас суралцан, Ковидын хүнд үед хоёр ч шинэ бизнесийг миний хувьд амжилттай эхлүүлж чадсан. Улмаар үргэлжлүүлэн Жэк Вэлчийн Менежментийн Институтад (Стрэйр Их Сургуулийн дэргэдэх) суралцан боловсролын зэргээ нэмж, өөрийн бизнестээ бодит хувь нэмрийг оруулан ажиллаж байна.
Тиймээс Монголын ирээдүй болсон олон залуусын амжилтад хувь нэмэр болох үүднээс энэхүү номыг орчуулах санаачилга гарган, НЭПКО хэвлэлийн газартай хамтран уншигч та бүхэндээ хүргэж буйдаа баяртай байна. Ирээдүйн олон шилдэг захирал, манлайлагчид төрөн гарах болтугай.
“Лидер болох хүртэл өөрийгөө хөгжүүл, Лидер болсны дараа бусдыг хөгжүүл” гэх зохиогчийн гайхалтай эшлэлээр уншигчдадаа урмын ерөөл өргөе.
Өнөөдөр суралц, Маргааш хэрэгжүүл...